صاحبة السعادة

وسط اخبار الحروب والتحرش حابب اذكر خبر انساني كدة يعني اشيل غمة السنة اللي داخلة برجليها الشمال ، وبعيدا عن اصطناع رضوي الشربيني وسماجة مني الشاذلي..

الدور اللي بتقوم بيه الجميلة اسعاد يونس هو دور انساني جميل ما يطلعش غير من انسانة سوية متصالحة مع نفسها ومعاها طقم اعداد وانتاج محترم جدا ..

امبارح علي اليوتيوب أنا اتفرجت علي حلقة بهاء سلطان والحزن والهم اللي باينين علي وشه والدموع مكتومه بكل قهر ووجع بسبب ابتعاده حوالي ٨ سنين عن الساحة رغم صوت وموهبة بهاء سلطان اللي مش هتتكرر تاني ،واحد اتعرض لظلم من منتج مفتري ضيّع مسيرة فنية كانت ممكن تبقي ثرية جدا جدا بدل القرف اللي بيتسمع اليومين دول ...صاحبة السعادة جات بمنتهي الحنية وجبر الخواطر شالت التراب من علي صوت بهاء سلطان ،واتوقع انه مش هيبعد اكتر وهيرجع للساحة تاني بعد حلقته معاها ..

- قبلها بفترة استضافت رامي جمال وجبرت بخاطرو ساعتها كان بيمر بحالة نفسية زي الزفت بسبب تعرضه لمرض البهاق وجهل الناس حواليه انه مرض معدي ،حاجة كانت بتخلي رامي جمال يفكر انه يعتزل الفن والناس ويبعد علشان يرتاح ،رامي اللي سمعنا ميدلي بصوته تاريخي في الحلقة دي تقول انه فنان بدرجة خبير وخسارة حد محترم زيه يقعد ويتسمع قرف المهرجانات ..

بعد الحلقة دي رامي جمال عمل اكتر من حفلة والطلب عليه زاد وربنا عوضه نفسيا قبل ماديا بحب ودعم الناس بسبب حلقة صاحبة السعادة ..

يا ست اسعاد ..يا صاحبة السعادة ،ربنا يجبر بخاطرك ويريّح قلبك ويسعدك زي ما بتسعدي الناس وبتسعدينا ضيف خفيف علي قلوبنا وبيوتنا في كل حلقة انتي الحاجه الوحيده النضيفه اللي موجوده وسط الاعلام المطبلاتي الهابط !❤

الانسانية وجبر الخواطر دين يا جماعة ..اعتنقوها !!
جبر_الخواطر_علي_الله❤
صاحبة السعادة،اسعاد يونس،بهاء سلطان،رامى جمال،رضوى الشربينى،منى الشاذلى.