القواعد الاربعين لحديثي الولاده 👼👶
القواعد الاربعين لحديثي الولاده 👼👶
1_رضعي طبيعي
٢_بلاش أعشاب وﻻ ينسون وﻻحاجة غير رضاعه
و بلاش بيبي درينك
٣- فحص السمع للمولود مهم و ليس رفاهية
٤_بلاش جلوكوز
٥_ڤيتامين "د" من أول يوم ٤ نقط ڤي دروب بالفم الصبح.
٦_تطعيم ڤيروس بي أول ٢٤ ساعة حتى في أيام الجمعة و العطلات الرسمية .. في الوحدات الصحية و أقسام النساء في المستشفيات الحكومية
٧_ما تربطيش حاجة على السرة وﻻ تلفيها على بطنه مافيش حاجة اسمها عشان تسند ظهره !
٨_رضعى طبيعى بدرى على قد ما تقدرى.
٩_نظفي السره بالكحول كل 6 ساعات .
١٠_السرسوب في الاول افيد حاجة من اللبن .
١١_الرضاعة الصناعى اغلبها موضه ومش بنكتبها اﻻ للضروة مش عشان طفلك يكلبظ !
١٢_تحليل الكعب للغده يوم السبت و الثلاثاء في كل الوحدات الصحية اول اسبوع للوﻻده..
١٣_حديث الولادة إنسان و بيحتاج النظافة ..و بيستحمى عادي .
١٤_ممنوع بوس الطفل من الفم.
١٥_بلاش بوس أحسن ..بينقل أمراض.
١٦_تطعيم الدرن "حقنة الكتف" ..في أول شهر ما تتأخريش.
١٧_مفيش في السبوع غربلة ..الغربلة=نزيف في المخ .
١٨_تكحيل الطفل بالبصل ممنوع..عينه هتضيع.
١٩_نقط مطهرة للعين روتين في أول أسبوع.
٢٠_ورق مهم و هتحتاجيه شهور : كراسة التطعيمات..منحنيات النمو تشمل الوزن و الطول و محيط الرأس
٢١_ركزي مع وزن طفلك ساعة الولادة ..احفظيه، الطبيعي من 2.5 ل 4 كيلو في المتوسط بيزيد حوالى ٧٥٠ جم أول 4 شهور.
٢٢_٦٠٪ من المواليد بيصفروا ..صفرا طبيعية حميدة ما تقلقيش.
٢٣_الصفرا عايزة رضاعة و متابعة أو حضانة و علاج ضوئي مش عايزة نيون و لا ڤيتامين و لاجلوكوز
٢٤_المولود إنسان ..إحساسه بالجو زينا..بلاش بطاطين في أغسطس ..هيفطس
٢٥_الزغطة و الخنفرة و الحزقة ظواهر طبيعية هتقل مع الوقت.
٢٦_ظواهر تقلقك : الطفل رافض الرضاعة أو مش قادر يرضع ، لونه بيزرق، نفسه فيه نهجان ، مدروخ و مش بيصحى.
٢٧_اهتمي بنفسك و صحتك عشان تقدري تهتمي بمولودك..كلي أكل صحي و متوازن ، بلاش أدوية من غير داعي، اشربي لبن ..كتير، و بلاش اكل حراق أو بيعمل انتفاخات .
٢٨_حديث الولادة بينام كتير بس متقطع..نومك هيتلخبط ..بترضعي و تغيري و تدلعي و تنيمي.
٢٩_حديث. الولادة بيسمع من و هو جنين ف اخر شهور الحمل..لو مفيش فزع أو خضة من الصوت العالي تقلقي .
٣٠_لازم طفلك يعمل براز في أول ٢٤ ل 36 ساعة و بيكون لونه أسود قاتم ..لو معملش استشيري الطبيب
٣١_أنماط الإخراج مختلفة عند حديثي الولادة..فيه طفل بعد كل رضعة يعمل براز و طفل يعمل مرة في اليوم وطفل كل اسبوع.
٣٢_النوم على البطن ممنوع ..إلا بعد الرضاعة للتجشؤ و انتي صاحية .
٣٣_غيري الحفاضه بانتظام وماتسيبيهاش كتير و نشفي كويس. و ادهني زيت زيتون والزنك ..هتحميه من التسلخات.
٣٤_لو بنت اتأكدي من وجود فتحة المهبل..لو ولد حسي الخصيتين و شوفي فتحة القضيب في مكانها و لا لأ..
٣٥_الأب: فينك ؟! ..واحشنا و الله ^^
٣٦_أول ما فترة النفاس تخلص شوفي وسيلة منع حمل مناسبة ما تنسيش ..طفلك محتاج رعايتك قبل ما تعمليها تاني و صحتك هتروح
٣٧_طفلك بيعيط كتير ..عليكي تخمني السبب و مع الوقت هتفهميه.
جعان _رضعيه ،، شبعان و منفوخ _كرعيه،، عنده مغص دلكيه وخدى دوا للتقلص،، عايز حد يشيله شيليه ..ما تسيبيش طفلك يعيط عشان ما يتعودش على الشيل..هو إنسان و عايز اهتمام و الاهتمام ما بيطلبش .
٣٨_السخونية و الكحة في حديثي الولادة مش طبيعية و مش حميدة ..لازم دكتور و تحاليل.
٣٩_مافيش حاجة اسمها جلسات موسعه للشعب الطفل ممكن يتعود عليها مش مخدرات هى !
٤٠_حبي طفلك ..ولد أو بنت..أسمر أو ابيض ..سليم أو مريض ..ده قطعة من روحك ما تخليش حد أبدا يصنفه.
